అవినీతి రాజ్యం..

మన జాతీయ జంతువు ఏది అని అడిగితే,

`పులి' ...అంటూ ఠక్కున సమాధానం వచ్చేస్తుంది.

మన జాతీయ పక్షి ఏది అంటే,

నెమలి అని కూడా చెప్పేస్తారు..

మరి మన జాతీయ లక్షణం ఏది అని అడిగితే...

ఈ ప్రశ్నకు కూడా తడుముకోకుండా ఠక్కున సమాధానం చెప్పేయవచ్చు.

మన జాతి లక్షణం అవినీతి...

దేశ జనాభాలో 60 శాతం మందిలో ప్రవహిస్తున్నది అవినీతి రక్తం.

అవినీతి ఒక శ్వాసగా మారిపోయింది...

అవినీతి ఒక ధ్యాసగా మారిపోయింది...

బ్రిటీష్ సామ్రాజ్యాన్ని గడగడలాడించిన సమర యోధులున్న దేశం మనది..

ప్రజాస్వామ్యంలో బంగారు బాటలు వేసుకోవచ్చని కలలుకన్న దేశం మనది..

కానీ స్వాతంత్ర్యం వచ్చిన ఏడాదికే తొలి కుంభకోణం వెలుగుచూసింది.

దేశం ఎటు దిగజారిపోతుందో ఆనాడే తెలిసిపోయింది..

స్వేచ్ఛ చివరకు ఎవరి గుప్పెట్లో చిక్కుకుంటుందో అప్పుడే అర్థమైంది..

అప్పటి నుంచి వందలాది కుంభకోణాలు వెలుగుచూస్తూనే ఉన్నాయి..

లక్షల కోట్ల అవినీతి పేరుకుపోతూనే ఉంది...

కుంభకోణాల చిట్టా సాగిపోతోంది..

అవినీతి కోణాల సంఖ్య పెరిగిపోతూనే ఉన్నాయి.

అక్రమార్కుల అరాచకం పెట్రేగిపోతూనే ఉంది.

అవినీతి కారణంగా ఏ సంక్షేమ పథకం పూర్తి స్థాయి ఫలితాలను ఇవ్వలేకపోతున్నాయి.

పేదలు నిరుపేదలుగా మారిపోతున్నారు...

సంపన్నులు కుబేరులుగా ఎదిగిపోతున్నారు...

ఆర్థిక అసమానతలు పెరిగిపోతున్నాయి.

అంతులేని సంపద అవినీతి పరుల సొత్తుగా మారిపోతున్నది.

బాపూజీ కలలు కన్న రాజ్యం ఇదేనా..?

దేశప్రజలందరికీ స్వాతంత్ర్య ఫలాలు అందాలని జాతిపిత ఆకాంక్షిస్తే, చివరకు పరిస్థితి దానికి పూర్తి విరుద్ధంగా తయారైంది.

ఇప్పటికైనా మహాత్ముని స్మరించుకొని మనమంతా శపథం చేద్దాం.

అవినీతిని నిర్మూలించి నవ్య దేశాన్ని నిర్మిద్దాం.

అవినీతి లేని దేశంగా ఇండియాను తీర్చిదిద్దుదాం.

అందుకు ఇప్పుడే, ఈ క్షణమే మనమంతా శపథం చేద్దాం.

మౌనం వీడండి...అవినీతిని తరిమికొట్టండి..

అమ్మ ప్రేమ..

అమ్మ ప్రేమకు వెల కట్టలేమన్నది ఈ గోమాతను చూస్తేనే అర్థమవుతుంది...

ప్రేమంటే ఇదేనా?

ప్రేమ ...
రెండు అక్షరాల కలయిక
రెండు హృదయాల చేరిక
ఇద్దరిని ఒక్కటిగా మారుస్తుంది      
రెండు జీవితాలను ఏకం చేస్తుంది
నిరక్షర కుక్షి కాస్త కాళిదాసులా మారిపోతాడు
కురూపి కూడా నవమన్మథుడిలా తయారవుతాడు
చెప్పుకుంటే ఈ కవిత్వం తరగదు.
చెప్పకుంటే మనసు ఊరుకోదు...

ప్రేమ  ప్రేమంటారు.
ప్రేమే జీవితమంటారు
ప్రేమ కోసం దేనినైనా కాదంటారు
ప్రేమ లేనిదే లైఫే లేదంటారు
ఆ ప్రేమ కోసం..
అర్రులు చాస్తారు
వెంటపడతారు
వేధిస్తారు
అదిరిస్తారు
బెదిరిస్తారు
అనుకున్న ప్రేమ దక్కకపోతే చంపేస్తారు.
ప్రేమంటే ఇదేనా?
ప్రేమంటే ఇంతేనా?

స్నేహం ప్రేమగా,

ప్రేమ అధికారంగా,

చివరకు పగగా మారి... ప్రాణాలను తీస్తోంది.

నేటి ప్రేమలు.. చూపులతో మొదలై,
మాటలతో పెరిగి,
అపార్థాలతో విడిపోతున్నాయి.
మనసులోని భావాన్ని మనసుతోనే గుర్తించగలిగితే అది పరిణితి చెందిన ప్రేమవుతుంది.
ఆలోచిస్తే ప్రేమకు అర్థం అనంతం. ఆలోచించలేని వారి గురించి ప్రస్తావించడం ఇక్కడ అనవసరం.
కొందరి నోళ్లలో పడి.. మరికొందరి ఆలోచనల్లో నలిగి.. అష్టవంకర్లూ తిరిగి, అపహాస్యం పాలైపోతోంది ప్రేమ.
గులాబీ రెక్కల ఎరుపుదనమే  ప్రేమికులకు కనిపిస్తుంది. ఆ రెక్కల మాటునున్న ముళ్ల కరుకుదనం పెద్దలకు తెలుస్తుంది. ఆకర్షణనే ప్రేమగా భావించి.. అభం శుభం తెలియని అమాయకుల ప్రాణాలను బలిగొంటున్నారు కొందరు నరరూపరాక్షసులు.


ప్రేమ ప్రేమ అంటారు.
ఇంతకీ ప్రేమంటే ఏంటి?
యువతీ యువకుల మధ్య ఉన్నదే ప్రేమా?
మరి తల్లిదండ్రులు, బిడ్డలు మధ్య ఉన్నదేంటి?
అన్నదమ్ములు, అక్కచెల్లెళ్లు మధ్య ప్రేమ సంగతేంటి?
ఇంట్లో పెద్దాళ్లకు, చిన్నాళ్లకు మధ్య ఉన్న బంధమేంటి?
ఎందుకు కుటుంబ ప్రేమలు కనుమరుగవుతున్నాయి?
అన్నదమ్ముల మధ్య గొడవలు, అక్కచెల్లెళ్ల మధ్య తగవులు
తండ్రీ కొడుకుల మధ్య వాగ్వాదం, తల్లికూతుళ్ల మధ్య వివాదం
అక్కకి-చెల్లెకి, అన్నకి-తమ్ముడికి, తల్లిదండ్రులకు-బిడ్డలకు ఎవరికీ పడదు. ఒకరంటే మరొకరికి గిట్టదు. ఎక్కడొస్తోంది తేడా? తెల్లారి లేస్తే... హత్యలు, అత్యాచారాలు, దోపిడీలు, దౌర్జన్యాలు.. సమాజం ఇంతలో ఎంతలా మారిపోయింది? ఒక్కమాటలో చెప్పాలంటే మానవ సంబంధాలు కనుమరుగు అయిపోతున్నాయి. మాయని మచ్చను తీసుకొస్తున్నాయి. మనిషిని మనిషిగా బతకనివ్వడం లేదు. మనశ్శాంతిగా ఉండనివ్వడం లేదు. ఇక ఇలాంటప్పుడు నిజమైన ప్రేమకు చోటెక్కడ?

first post

హాయ్ స్వాగతం నా బ్లాగ్ లోకి